ଧୁମ୍‌ଧାମ୍‌ରେ ଶେଷ ହେଲା ବାବା ଆଖଣ୍ଡଳମଣୀଙ୍କ ପ୍ରସିଦ୍ଧ ଶିବ ବିବାହ ଉତ୍ସବ

 

ଚାନ୍ଦବାଲି:-

ଭଦ୍ରକ ଜିଲ୍ଲା ଆରଡିରେ ବାବା ଆଖଣ୍ଡଳମଣୀଙ୍କ ମନ୍ଦିରରେ ପ୍ରସିଦ୍ଧ ଶିବବିବାହ ପାଇଁ ମଙ୍ଗଳବାର ସନ୍ଧ୍ୟା ଠାରୁ ଉତ୍ସବ ମୁଖର ହୋଇ ଉଠିଥିଲା ସମଗ୍ର ପୀଠ । ମନ୍ଦିର ପରିସର ଓ ପୀଠକୁ ରଙ୍ଗୀନ ଆଲୋକରେ ସୁସଜ୍ଜିତ କରାଯାଇଥିବା ବେଳେ ଫୁଲରେ ଝଲସୁଛି ଥିଲା ମନ୍ଦିର ମୁଖ୍ଯ ଦ୍ବାର 

ସୋମବାର ବୈଦିକ ରୀତିନୀତି ଅନୁଯାୟୀ ବରପିତା କେଦାରନାଥ ପାଢୀ ଓ କନ୍ଯାପିତା ଗଦାଧର ପାଢୀଙ୍କ ପକ୍ଷରୁ ଦେବଦମ୍ପତିଙ୍କର ମଙ୍ଗଳପାଗ ନୀତି ଓ ମଙ୍ଗଳବାର ବରଧରା ସମ୍ପନ୍ନ ହୋଇଥିବା ବେଳେ ରାତିରେ ବିବାହ କାର୍ଯ୍ୟ ଅନୁଷ୍ଠିତ ହେଲା ।

ଏଥିପାଇଁ ଭଦ୍ରକ ଜିଲ୍ଲାପାଳ ସିଦ୍ଧେଶ୍ବର ବଳିରାମ ବୋନ୍ଦର, ଚାନ୍ଦବାଲି ବିଡିଓ ଅସିତ ମହାନ୍ତି, ତହସିଲଦାର ଅଶ୍ବିନୀ କୁମାର ଭୂୟାଁ, ଧାମନଗର ଏସଡିପିଓଙ୍କ ସହ ବିଭିନ୍ନ ବିଭାଗର ଅଧିକାରୀମାନେ ପୀଠରେ ରହି ସମସ୍ତ କାର୍ଯ୍ଯର ତଦାରଖ କରିଥିଲେ । ବିଶେଷ କରି ପୀଠରେ ଚଳିତବର୍ଷ ତ୍ରିସ୍ତରୀୟ ସୁରକ୍ଷା ବ୍ଯବସ୍ଥା ସହିତ ଟ୍ରାଫିକ ବ୍ଯବସ୍ଥାକୁ କଡାକଡି କରାଯାଇଥିଲା । ଏହାସହ ପୀଠ ନିକଟରେ ଥିବା ୩ଟି ନଦୀଘାଟର ଉଭୟ ପାର୍ଶ୍ବରେ ସୁରକ୍ଷା ବ୍ଯବସ୍ଥା କରାଯିବା ସହିତ ନଦୀ ମଧ୍ଯରେ ଓଡ୍ରାଫ ଓ ଅଗ୍ନିଶମ ବାହିନୀ ପଇଁତରା ମଧ୍ୟ ମାରିଥିଲେ ।