ନୂଆଦିଲ୍ଲୀ :
ଇସ୍ରାଏଲ–ଇରାନ ସଂଘର୍ଷ ପରିସ୍ଥିତିକୁ ନେଇ କିଛି ନ୍ୟୁଜ୍ ଟିଭି ଚ୍ୟାନେଲ ଅତ୍ୟଧିକ ସେନସେସନାଲ ଓ ଅନୁମାନ ଭିତ୍ତିକ ଖବର ପ୍ରସାରଣ କରୁଥିବା ଦେଖି କେନ୍ଦ୍ର ସରକାର କଡା ନିଷ୍ପତ୍ତି ନେଇଛନ୍ତି।
ସୂଚନା ଓ ପ୍ରସାରଣ ମନ୍ତ୍ରାଳୟ ଜାରି କରିଥିବା ନିର୍ଦ୍ଦେଶ ଅନୁସାରେ, ନ୍ୟୁଜ୍ ଟିଭି ଚ୍ୟାନେଲମାନଙ୍କ ଟେଲିଭିଜନ୍ ରେଟିଂ ପଏଣ୍ଟ (TRP) ରିପୋର୍ଟ ତତ୍କାଳ ଚାରି ସପ୍ତାହ ପର୍ଯ୍ୟନ୍ତ ପ୍ରକାଶ ବନ୍ଦ କରାଯିବ।
ମନ୍ତ୍ରାଳୟର କହିବା ଅନୁସାରେ, ଯୁଦ୍ଧ ପରିସ୍ଥିତି ସମୟରେ କିଛି ଚ୍ୟାନେଲ ଅପରିପକ୍ୱ ଓ ଅତିରଞ୍ଜିତ ଖବର ପ୍ରସାରଣ କରୁଥିବାରୁ ସାଧାରଣ ଲୋକଙ୍କ ମଧ୍ୟରେ ଅନାବଶ୍ୟକ ଭୟ ଓ ଅସ୍ଥିରତା ସୃଷ୍ଟି ହେବାର ଆଶଙ୍କା ରହିଛି।
ସେହିହେତୁ ସାର୍ବଜନୀନ ହିତକୁ ଦୃଷ୍ଟିରେ ରଖି BARC କୁ ତତ୍କାଳ ନ୍ୟୁଜ୍ ଚ୍ୟାନେଲମାନଙ୍କ TRP ରିପୋର୍ଟ ପ୍ରକାଶ ଅସ୍ଥାୟୀ ଭାବେ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି।
ଏହି ନିଷ୍ପତ୍ତି ଚାରି ସପ୍ତାହ ପର୍ଯ୍ୟନ୍ତ କିମ୍ବା ପରବର୍ତ୍ତୀ ନିର୍ଦ୍ଦେଶ ଆସିବା ପର୍ଯ୍ୟନ୍ତ ବୈଧ ରହିବ ବୋଲି ସୂଚନା ଓ ପ୍ରସାରଣ ମନ୍ତ୍ରାଳୟ ପକ୍ଷରୁ କୁହାଯାଇଛି।
