ବେଳପାହାଡ଼ ଲେଭେଲ କ୍ରସିଂ (LC-268) ଠାରେ ରେଲୱେ ଓଭର ବ୍ରିଜ୍ (ROB) ନିର୍ମାଣ ପାଇଁ ପ୍ରକ୍ରିୟା ଗତିଶୀଳ ହୋଇଛି। ସାଉଥ ଇଷ୍ଟ ସେଣ୍ଟ୍ରାଲ ରେଲୱେ (SECR) ପକ୍ଷରୁ ଓଡିଶା ସରକାରଙ୍କ ପବ୍ଲିକ ୱର୍କସ୍ ବିଭାଗକୁ ଏନେଇ ପତ୍ର ଲେଖାଯାଇଛି।
ସୂଚନାନୁସାରେ, ମାନ୍ୟବର ସାଂସଦ ପ୍ରଦୀପ ପୁରୋହିତଙ୍କ ଦାବି ଅନୁଯାୟୀ ବେଳପାହାଡ଼ରେ ROB ନିର୍ମାଣ ପ୍ରସ୍ତାବ ଆସିଥିଲା। ୨୨ ଜାନୁଆରୀ ୨୦୨୬ରେ ହୋଇଥିବା ବାର୍ଷିକ ବୈଠକରେ ଏହି ପ୍ରସଙ୍ଗ ଉଠିଥିଲା ଏବଂ ଏହାକୁ ଶୀଘ୍ର ଅମଲ କରିବା ପାଇଁ ସିଦ୍ଧାନ୍ତ ହୋଇଛି।
ଏହି ପ୍ରକଳ୍ପଟି “ସିଙ୍ଗଲ ଏଣ୍ଟିଟି ବେସିସ୍” ରେ ଓଡିଶା ପବ୍ଲିକ ୱର୍କସ୍ ବିଭାଗ ଦ୍ୱାରା କାର୍ଯ୍ୟାନ୍ବୟ କରାଯିବ। ରେଲୱେ ଓ ଓଡିଶା ସରକାର ମିଶିତ ଭାବେ ଏହାର ଖର୍ଚ୍ଚ ବହନ କରିବେ। ଜମି ଅଧିଗ୍ରହଣ ସମ୍ପୂର୍ଣ୍ଣ ଭାବେ ଓଡିଶା ସରକାରଙ୍କ ଦାୟିତ୍ୱରେ ରହିବ।
ରେଲୱେ ପକ୍ଷରୁ ଜଣାଯାଇଛି ଯେ, ଡିଟେଲ୍ଡ ଇଷ୍ଟିମେଟ୍ ପ୍ରସ୍ତୁତି ଓ ଅନୁମୋଦନ ପ୍ରକ୍ରିୟା ଚାଲିଛି। ଏହା ଅନୁମୋଦିତ ହେବା ପରେ ରେଲୱେ ତାଙ୍କ ଅଂଶର ଅର୍ଥ ଓଡିଶା ସରକାରଙ୍କୁ ଦେବ।
ତଥାପି, ROB ପାଇଁ ଦରକାରିଆ ଷ୍ଟ୍ରକ୍ଚୁରାଲ ଡ୍ରଅଇଂରେ କିଛି ତ୍ରୁଟି ଚିହ୍ନଟ ହୋଇଥିବାରୁ ଏହାକୁ ସଂଶୋଧନ କରିବାକୁ ପୂର୍ବରୁ ରାଜ୍ୟ PWD କୁ ଜଣାଇ ଦିଆଯାଇଥିଲା। କିନ୍ତୁ ଏପର୍ଯ୍ୟନ୍ତ ସେହି ତ୍ରୁଟି ସୁଧାର ହୋଇନାହିଁ। ଏହି ପରିସ୍ଥିତିରେ ଶୀଘ୍ର ସମସ୍ୟା ସମାଧାନ କରି ଡ୍ରଅଇଂକୁ ଅନୁମୋଦନ ପାଇଁ ପୁନର୍ବାର ପ୍ରେରଣ କରିବାକୁ ରେଲୱେ ପକ୍ଷରୁ ଅନୁରୋଧ କରାଯାଇଛି।
ରେଲ ପାଥର ସୁରକ୍ଷା ଓ ସାଧାରଣ ଲୋକଙ୍କ ସୁବିଧା ଦୃଷ୍ଟିରୁ ଏହି ROB ପ୍ରକଳ୍ପଟି ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
