ଏନ୍ଟିପିସି ଦର୍ଲିପାଲିର ପ୍ରମୁଖ ସିଏସ୍ଆର୍ ପଦକ୍ଷେପ ଗର୍ଲ ଏମ୍ପାୱରମେଣ୍ଟ ମିଶନ (ଜିଇଏମ୍)-୨୦୨୬ ମଙ୍ଗଳବାର କୋଣାର୍କ ଅଡିଟୋରିୟମରେ ଆୟୋଜିତ ଭବ୍ୟ ସମାପନୀ ଉତ୍ସବ ମାଧ୍ୟମରେ ସଫଳତାର ସହ ସମାପ୍ତ ହୋଇଛି। ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ ଥିଲା ଶିକ୍ଷା, ବ୍ୟକ୍ତିତ୍ୱ ବିକାଶ, ଆତ୍ମବିଶ୍ୱାସ ବୃଦ୍ଧି ଏବଂ ଦକ୍ଷତା ବିକାଶ ମାଧ୍ୟମରେ କିଶୋରୀମାନଙ୍କୁ ସଶକ୍ତ କରିବା।
ଏହି ଅବସରରେ ସୁନ୍ଦରଗଡ଼ ବିଧାୟକ ଯୋଗେଶ କୁମାର ସିଂହ ମୁଖ୍ୟ ଅତିଥି ଓ ସାରଙ୍ଗଧର ବରିହା, ଏଡିଇଓ, ସୁନ୍ଦରଗଡ଼ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏହାସହ ଏନ୍ଟିପିସି ଦର୍ଲିପାଲିର ବରିଷ୍ଠ ଅଧିକାରୀ, ଅଭିଭାବକ ଓ ସ୍ଥାନୀୟ ଲୋକମାନେ ଉପସ୍ଥିତ ଥିଲେ। କାର୍ଯ୍ୟକ୍ରମରେ ଫୈଜ ତୈୟବ, ପ୍ରକଳ୍ପ ମୁଖ୍ୟ (ଦର୍ଲିପାଲି) ଜିଇଏମ୍ର ଗୁରୁତ୍ୱ ସମ୍ପର୍କରେ ଆଲୋକପାତ କରି କହିଥିଲେ ଯେ, ଏହି ପଦକ୍ଷେପ କିଶୋରୀମାନଙ୍କ ମଧ୍ୟରେ ନେତୃତ୍ୱ, ଆତ୍ମବିଶ୍ୱାସ ଓ ଜୀବନମୂଳକ ଦକ୍ଷତା ବିକାଶରେ ସହାୟକ ହୋଇଛି।
ସମାପନୀ ଉତ୍ସବରେ ଅଂଶଗ୍ରହଣକାରୀ କନ୍ୟାମାନେ ସମ୍ବଲପୁରୀ ଲୋକନୃତ୍ୟ, ଯୋଗ ପ୍ରଦର୍ଶନ, ସମୂହ ସଙ୍ଗୀତ, ଅପରେସନ ସିନ୍ଦୂର ନାଟିକା, ନରସିଂହ ଅଭିନୟ ଓ ହାସ୍ୟରସାତ୍ମକ ପ୍ରଦର୍ଶନ ପରି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ। ଏହି ପ୍ରଦର୍ଶନୀଗୁଡ଼ିକ ମାସବ୍ୟାପୀ ପ୍ରଶିକ୍ଷଣରେ ସେମାନଙ୍କ ଆତ୍ମବିଶ୍ୱାସ ଓ ସୃଜନଶୀଳତାର ପ୍ରତିଫଳନ ଥିଲା।
କାର୍ଯ୍ୟକ୍ରମର ଅନ୍ୟତମ ଆକର୍ଷଣ ଥିଲା ଜିଇଏମ୍ ରିକ୍ୟାପ୍ ଫିଲ୍ମ, ଯେଉଁଥିରେ ପ୍ରକଳ୍ପର ବିଭିନ୍ନ ସ୍ମରଣୀୟ ମୁହୂର୍ତ୍ତ ଓ ସଫଳତାକୁ ଉପସ୍ଥାପନ କରାଯାଇଥିଲା। ଅତିଥିମାନେ ଏନ୍ଟିପିସି ଦର୍ଲିପାଲିର ଏହି ପ୍ରୟାସକୁ ପ୍ରଶଂସା କରି କହିଥିଲେ ଯେ, ଏପରି କାର୍ଯ୍ୟକ୍ରମ କିଶୋରୀମାନଙ୍କ ସର୍ବାଙ୍ଗୀଣ ବିକାଶ ପାଇଁ ନୂଆ ସୁଯୋଗ ସୃଷ୍ଟି କରୁଛି। ଶେଷରେ ସମସ୍ତ ଅଂଶଗ୍ରହଣକାରୀଙ୍କୁ ପ୍ରମାଣପତ୍ର, ଫଟୋ ଫ୍ରେମ ଓ ଉପହାର ପ୍ରଦାନ କରାଯାଇଥିଲା।
