ଝାରସୁଗୁଡା :
ଗ୍ରୀଷ୍ମ ଛୁଟି ସମୟରେ ଅନେକ ପରିବାର ଘର ଛାଡି ଭ୍ରମଣକୁ ବାହାରୁଥିବା ବେଳେ, ଘର ଓ ସମ୍ପତ୍ତିର ସୁରକ୍ଷା ନେଇ ଚିନ୍ତା ବଢ଼ିଯାଏ। ଏହି ପରିପ୍ରେକ୍ଷୀରେ Jharsuguda Police ଜନସାଧାରଣଙ୍କ ପାଇଁ ଜାରି କରିଛି ଏକ ବିଶେଷ ସୁରକ୍ଷା ପରାମର୍ଶ।
ପୋଲିସ ପକ୍ଷରୁ କୁହାଯାଇଛି ଯେ, ଘର ଖାଲି ରହିବା ସମୟରେ ପଡ଼ୋଶୀ କିମ୍ବା ଆତ୍ମୀୟଙ୍କୁ ସୂଚନା ଦେବା ଅତ୍ୟାବଶ୍ୟକ। ଏହା ସହ ନିକଟସ୍ଥ ପୋଲିସ ଥାନାକୁ ମଧ୍ୟ ଯାତ୍ରା ସୂଚନା ଜଣାଇବାକୁ ପରାମର୍ଶ ଦିଆଯାଇଛି।
ସମସ୍ତ ଦ୍ୱାର, ଜଣେଲା ଓ ଗେଟ୍ ଭଲଭାବରେ ବନ୍ଦ କରି ଯିବା ସହିତ ସିସିଟିଭି କ୍ୟାମେରା, ଆଲାର୍ମ ସିଷ୍ଟମ୍ ଓ ସ୍ମାର୍ଟ ଲକ୍ ବ୍ୟବହାର କରିବାକୁ ପୋଲିସ ଉପଦେଶ ଦେଇଛି।
ଏହା ଛଡ଼ା ସୋସିଆଲ୍ ମିଡିଆରେ ଯାତ୍ରା ସୂଚନା ପୋଷ୍ଟ ନ କରିବାକୁ ମଧ୍ୟ ସଚେତନ କରାଯାଇଛି, କାରଣ ଏହା ଚୋରମାନଙ୍କ ପାଇଁ ସୁଯୋଗ ସୃଷ୍ଟି କରେ। ଘରକୁ ନିୟମିତ ଯାଞ୍ଚ ପାଇଁ ବିଶ୍ୱସ୍ତ ବ୍ୟକ୍ତିଙ୍କୁ ଦାୟିତ୍ୱ ଦେବା ଓ ରାତିରେ ଆଲୋକ ବ୍ୟବସ୍ଥା ରଖିବାକୁ ମଧ୍ୟ ପରାମର୍ଶ ଦିଆଯାଇଛି।
ଘରେ ଟଙ୍କା, ଗହଣା ଭଳି ମୂଲ୍ୟବାନ ସାମଗ୍ରୀ ଖୋଲାରେ ରଖିବାରୁ ବର୍ଜନ କରି ବ୍ୟାଙ୍କ ଲକର ବ୍ୟବହାର କରିବାକୁ କୁହାଯାଇଛି। ସେଥିପାଇଁ ଘରୋଇ କାମକାଜ କରୁଥିବା ଲୋକଙ୍କ ଠିକଣା ଓ ପରିଚୟ ସତ୍ୟାପନ କରିବା ମଧ୍ୟ ଜରୁରୀ।
ଜରୁରୀ ପରିସ୍ଥିତିରେ ତୁରନ୍ତ 112 ହେଲ୍ପଲାଇନ୍ ନମ୍ବରକୁ ଡାଏଲ୍ କରି ପୋଲିସ ସହଯୋଗ ନେବାକୁ ଅନୁରୋଧ କରାଯାଇଛି।
ପୋଲିସ କହିଛି ଯେ, ସାଧାରଣ ଲୋକଙ୍କ ସଚେତନତା ଓ ସହଯୋଗ ଦ୍ୱାରା ଅପରାଧକୁ ରୋକାଯାଇପାରିବ।
