ନୂଆଦିଲ୍ଲୀ :
ଜାତୀୟ ରାଜପଥରେ ଯାତ୍ରୀମାନଙ୍କୁ ଆଶ୍ୱସ୍ତି ଦେବା ଲକ୍ଷ୍ୟରେ କେନ୍ଦ୍ର ସରକାର ଟୋଲ୍ ଟିକସ ନିୟମାବଳୀରେ ଗୁରୁତ୍ୱପୂର୍ଣ୍ଣ ସଂଶୋଧନ କରିଛନ୍ତି। ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ଦ୍ୱାରା ଜାତୀୟ ରାଜପଥ ଫି ନିୟମ, ୨୦୦୮ରେ କରାଯାଇଥିବା ଏହି ସଂଶୋଧନ ଅନୁଯାୟୀ, ଦୁଇ ଲେନ୍ ବିଶିଷ୍ଟ ଜାତୀୟ ରାଜପଥକୁ ଚାରି ଲେନ୍ କିମ୍ବା ତା'ଠାରୁ ଅଧିକ ଲେନ୍ରେ ପ୍ରଶସ୍ତ କରାଯାଉଥିବା ସମୟରେ ଗାଡ଼ି ଚାଳକଙ୍କଠାରୁ ପୂର୍ଣ୍ଣ ଟୋଲ୍ ଟିକସ ଆଦାୟ କରାଯିବ ନାହିଁ।
ନିର୍ମାଣ ଆରମ୍ଭ ହେବାରୁ ପ୍ରକଳ୍ପ ସମାପ୍ତି ପର୍ଯ୍ୟନ୍ତ ଯାତ୍ରୀମାନେ ନିର୍ଦ୍ଧାରିତ ଟୋଲ୍ର କେବଳ ୩୦ ପ୍ରତିଶତ ଦେବେ, ଯାହାର ଅର୍ଥ ୭୦ ପ୍ରତିଶତ ଟୋଲ୍ ଟିକସ ରିହାତି। ଦୀର୍ଘଦିନ ଧରି ରାସ୍ତା ନିର୍ମାଣ ସମୟରେ ଟ୍ରାଫିକ୍ ଜାମ୍, ଧୂଳି ଓ ଅସୁବିଧା ସତ୍ତ୍ୱେ ପୂର୍ଣ୍ଣ ଟୋଲ୍ ନିଆଯାଉଥିବା ନେଇ ଲୋକମାନେ ଅଭିଯୋଗ କରୁଥିଲେ। ଏହି ଅଭିଯୋଗର ସମାଧାନ ରୂପେ ଏହି ନୂଆ ନିୟମ ଆଣାଯାଇଛି।
ସରକାରୀ ବିଜ୍ଞପ୍ତି ଅନୁଯାୟୀ, ଏହି ନିୟମ ନୂଆ ବର୍ଷରୁ କାର୍ଯ୍ୟକାରୀ ହୋଇଛି ଏବଂ କେବଳ ନୂଆ ପ୍ରକଳ୍ପ ପାଇଁ ନୁହେଁ, ବରଂ ସମସ୍ତ ସେହି ଜାତୀୟ ରାଜପଥରେ ଲାଗୁ ହେବ ଯେଉଁଠାରେ ଦୁଇ ଲେନ୍ ରାସ୍ତାକୁ ଚାରି କିମ୍ବା ତଦୁର୍ଦ୍ଧ୍ୱ ଲେନ୍ରେ ପରିଣତ କରାଯାଉଛି।
ଅଧିକାରୀଙ୍କ କହିବା ଅନୁଯାୟୀ, ଦେଶରେ ପ୍ରାୟ ୨୫ ହଜାରରୁ ୩୦ ହଜାର କିଲୋମିଟର ଦୁଇ ଲେନ୍ ଜାତୀୟ ରାଜପଥକୁ ଚାରି ଲେନ୍ କରାଯିବ, ଯାହାପାଇଁ ପ୍ରାୟ ୧୦ ଲକ୍ଷ କୋଟି ଟଙ୍କା ବିନିଯୋଗ ହେଉଛି।
ସେହିପରି, ଚାରି ଲେନ୍ ବିଶିଷ୍ଟ ରାଜପଥକୁ ଛଅ କିମ୍ବା ଆଠ ଲେନ୍ କରାଯାଉଥିବା ସମୟରେ ଟୋଲ୍ ଟିକସରେ ୨୫ ପ୍ରତିଶତ ରିହାତି ମଧ୍ୟ ଦିଆଯିବ। ଏହି ଅବସ୍ଥାରେ ଯାତ୍ରୀମାନେ ନିର୍ଦ୍ଧାରିତ ଟୋଲ୍ର କେବଳ ୭୫ ପ୍ରତିଶତ ଦେବେ। ନୂଆ ନିୟମ ଫଳରେ ଲକ୍ଷ ଲକ୍ଷ ଗାଡ଼ି ଚାଳକଙ୍କ ପାଇଁ ଜାତୀୟ ରାଜପଥରେ ଯାତ୍ରା ଅଧିକ ସହଜ ଓ ସୁବିଧାଜନକ ହେବ।
