ରାତିରେ ସମସ୍ତେ ଶୋଇଥିବା ବେଳେ ଆକ୍ରମଣ କଲା ହାତୀ, କାନ୍ଥ ତଳେ ଚାପି ହୋଇ ୨ ବର୍ଷର ଶିଶୁପୁତ୍ର ମୃତ

 

ବେତନଟୀ ରେଞ୍ଜ ତଥା ବ୍ଲକ ଅଧୀନ ସଇତପୁର ଗ୍ରାମରେ ଶୁକ୍ରବାର ବିଳମ୍ବିତ ରତିରେ ବଣୁଆ ହାତୀପଲ ଗାଁକୁ ପଶିଆସିଆସିଥିଲେ। ଗ୍ରାମର ଯୁଧିଷ୍ଠିର କିସ୍କୁଙ୍କ ଘର ଉପରେ ଆକ୍ରମଣ କରିଥିଲେ। ଫଳରେ କାନ୍ଥତଳେ ଚାପିହୋଇ ଦୁଇବର୍ଷର ଶିଶୁପୁତ୍ର ଦିବ୍ୟପ୍ରକାଶ କିସ୍କୁର ଶୋଚନୀୟ ମୃତ୍ୟୁ ଘଟିଛି।

ସୂଚନାନୁଯାୟୀ, ଖାଦ୍ୟ ଅନ୍ୱେଷଣରେ ୭ ଟିକିଆ ହାତୀପଲ ଶୁକ୍ରବାର ବିଳମ୍ବିତ ରାତିରେ ସଇତପୁର ଗାଁକୁ ପଶି ଆସିଥିଲେ।

ତନ୍ମଧ୍ୟରୁ ଦୁଇଟି ହାତୀ ଯୁଧିଷ୍ଠିରଙ୍କ ଘର ଉପରେ ଆକ୍ରମଣ କରିଥିଲେ। ଘର ଭିତରେ ଜେଜେମା ସାଲଗେ କିସ୍କୁ, ମା' ରୀନା କିସ୍କୁଙ୍କ ସହିତ ଚଟାଣରେ ଶୋଇଥିବା ଦିବ୍ୟପ୍ରକାଶଙ୍କ ଉପରେ କାନ୍ଥ ଗଡି ପଡ଼ିଥିଲା। ମା ଓ ଜେଜେମା ଅଳ୍ପକେ ବର୍ତ୍ତି ଯାଇଥିବା ବେଳେ ଦିବ୍ୟପ୍ରକାଶ କିନ୍ତୁ କାନ୍ଥତଳେ ଚାପି ହୋଇ ରହିଯାଇଥିଲେ। ହାତୀ ଭୟ ଥମିବା ପରେ କୌଣସି ପ୍ରକାରେ କାନ୍ଥତଳୁ ଦିବ୍ୟପ୍ରକାଶଙ୍କୁ ଉଦ୍ଧାର କରି ବନବିଭାଗ ସହାୟତାରେ ବେତନଟୀ ଡାକ୍ତରଖାନାରେ ଭର୍ତ୍ତି କରିଥିଲେ। ହେଲେ ସେଠାରେ କାର୍ଯ୍ୟରତ ଡାକ୍ତର ଦିବ୍ୟପ୍ରକାଶଙ୍କୁ ମୃତ ଘୋଷଣା କରିଥିଲେ। ଜେଜେମା ଓ ମା' ଆଗରେ ଦୁଇବର୍ଷର ଶିଶୁପୁତ୍ରର ଶୋଚନୀୟ ମୃତ୍ୟୁକୁ ନେଇ ପୁରା ପରିବାର ସ୍ତବ୍ଧ ହୋଇପଡିଥିବା ବେଳେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି। ବୈଶିଙ୍ଗା ପୁଲିସ ଅପମୃତ୍ୟୁ ମାମଲା ରୁଜୁକରି ଶବ ବ୍ୟବଚ୍ଛେଦ ପ୍ରକ୍ରିୟା ଆରମ୍ଭ କରିଛି।